Misioni dhe vizioni
Rrënjët tona janë në Shqipëri; zëri ynë është kudo.
Misioni
United Diaspora for Albania (UDA) synon të bashkojë zërat, kapacitetet dhe përvojat e shqiptarëve në mbarë botën në një rrjet të vetëm qytetar, të fuqishëm dhe të koordinuar, në shërbim të interesit më të lartë kombëtar shqiptar. Rrënjët tona janë në Shqipëri; zëri ynë është kudo.
Vizioni
Synimi ynë është që energjia e lindur nga Revolucioni i Flamingove të mos mbetet vetëm një moment proteste, por të shndërrohet në një infrastrukturë të qëndrueshme, të pavarur dhe të bashkuar qytetare — e aftë të ngrejë zërin dhe të mobilizohet sa herë që interesat e Shqipërisë dhe shqiptarëve cenohen apo rrezikohen. Duam një diasporë të organizuar, transparente dhe të angazhuar institucionalisht, që bashkëpunon ngushtë me zërin qytetar brenda Shqipërisë dhe me institucionet ndërkombëtare që mbështesin demokracinë, shtetin e së drejtës dhe të drejtat e njeriut.
Objektivat
Të lidhim aktivistë dhe komunitete shqiptare nga +30 shtete të botës në një rrjet të decentralizuar, të koordinuar dhe të qëndrueshëm, që flet me një zë kur interesi kombëtar është në rrezik.
Të ndërtojmë dhe forcojmë komunikimin me institucione si Parlamenti Evropian, Departamenti i Shtetit i SHBA-së, Organizata e Kombeve të Bashkuara dhe organizata të tjera ndërkombëtare që mbështesin demokracinë e shtetin e së drejtës.
Të kërkojmë transparencë dhe llogaridhënie nga institucionet shqiptare, duke mbështetur çdo hap që forcon shtetin e së drejtës dhe interesin publik.
Të kthejmë energjinë e protestave në një strukturë organizative të përhershme, e aftë të mobilizohet shpejt dhe në mënyrë të koordinuar sa herë që nevojitet, në bashkëpunim me zërin qytetar brenda Shqipërisë.